हुमाकान्त पोखरेल, गुल्मी
३२ जेठ । गुल्मीको चन्द्रकोट गाउँपालिका–५ ग्वाघामा स्वास्थ्य चौकीको निर्माण गरिएको छ । नवनिर्मित स्वास्थ्य चौकीको बिहीबार जिल्ला समन्वय समिति प्रमुख दोर्ण बहादुर खत्रीले उद्घाटन गरे । शहरी विकास तथा भवन निर्माणको सहयोगमा कुल एक करोड २६ लाखको लागतमा निर्माण हुनेगरी ०७५ चैतमा स्वास्थ्य चौकी निर्माणको सम्झौता गरिएको थियो ।
यसभन्दा पहिले ग्वाघाको वडा कार्यालयबाट स्वास्थ्य चौकीको सेवा प्रवाह हुँदै आएको थियो । स्वास्थ्य चौकी बनेसँगै स्थानीयलाई सहज भएको छ । कार्यक्रममा बोल्दै प्रमुख अतिथि समेत रहेका प्रमुख खत्रीले स्वास्थ्य चौकीबाट प्रवाह गर्ने सेवा सुविधा गुणस्तरीय हुनुपर्ने बताए ।
कार्यक्रममा बोल्दै गाउँपालिका अध्यक्ष युवराज केसीले अर्को बर्षदेखि ग्वाघा स्वास्थ्य चौकीमा ल्याब सेवा सुरु गर्ने बताए । चन्द्रकोटले स्वास्थ्य क्षेत्रलाई प्राथमिकता दिएको बताउदैँ अध्यक्ष केसीले नागरिकको स्वास्थ्यप्रति स्थानीय सरकार गम्भीर र जिम्मेवार रहेको प्रतिक्रिया दिए
