नगर विकास तथा वातावरण संरक्षण संस्थाको साधारण सभा एवं अधिवेशन सम्पन्न

गुल्मी, ०५ भदौ
गुल्मीको रेसुङ्गा नगरपालिकास्थित नगर विकास तथा वातावरण संरक्षण संस्थाको तेस्रो साधारण सभा एवं दोस्रो अधिवेशन सम्पन्न भएको छ । सदरमुकाम तम्घासमा शुक्रबार सम्पन्न भएको कार्यक्रमबाट राम प्रसाद पन्थीको अध्यक्षतामा २६ सदस्यीय नगर विकास तथा वातावरण संरक्षण संस्थाको गठन गरिएको छ । जसको उपाध्यक्षमा कृष्ण प्रसाद भण्डारी, महासचिवमा कृष्ण प्रसाद पोखरेल, सचिवमा घनश्याम पाण्डे, कोषाध्यक्षमा उमकला पाण्डे र सह–कोषाध्यक्षमा सीता आचार्य लगायत अन्य सदस्यहरु रहेका छन् । कार्यक्रममा महासचिव कृष्ण प्रसाद पोखरेलले संस्थाको कार्यसमितिको प्रतिवेदन एवम् कोषाध्यक्ष उमकला पाण्डेले आर्थिक प्रतिवेदन प्रस्तुत गरेकी थिइन् ।

२०७३ सालमा विधिवत रुपमा तदर्थ समिति गठन गरी स्थापना भएको संस्थाले हाल तम्घास नगरभित्रको फोहोर व्यवस्थापनलाई मुख्य प्राथमिकता दिएको छ । दुई वटा सवारी साधनबाट फोहोर व्यवस्थापनको काम गरेको संस्थाले अहिले एक हजार ५०३ घर, सात विद्यालय र २३ वटा वित्तीय संस्था तथा कार्यालयहरु गरी जम्मा एक हजार ५३३ उपभोक्ताहरुलाई सुविधा दिएको छ । जसका लागि नगरपालिकाको वडा नम्बर १, २, ७, ८ र ९ वडालाई विभिन्न २० वटा टोल समितिमा विभाजन गरिएको महासचिव कृष्ण प्रसाद पोखरेलले प्रस्तुत गरेको प्रतिवेदनमा उल्लेख गरिएको छ ।


संस्थाका कोषाध्यक्ष उमकला पाण्डेले गत आर्थिक बर्ष ०७९÷८० को २४ लाख ५३ हजार ९८ रुपैँया बराबरको आर्थिक प्रतिवेदन र चालु आर्थिक बर्ष ०८०÷८१ को ३७ लाख ७६ हजार ७०४ रुपैँया बराबरको अनुमानित आयव्यय प्रस्तुत गरेकी थिइन् । कार्यक्रमकै अवसर पारेर संस्थामा विगत १८ बर्षदेखि सवारी चालकको रुपमा काम गर्दै आएका हरी बहादुर थापालाई सम्मान पत्र, दोसल्ला एवम् नगद पुरस्कारले सम्मान गरिएको थियो । कार्यक्रममा बोल्दै प्रमुख आतिथि रेसुङ्गा नगरपालिकाकी उप–प्रमुख अमृता देवी कुँवरले संस्थाले नगरको सरसफाईको क्षेत्रमा उल्लेख्य योगदान गरेको भन्दै आगामी दिनमा संस्थालाई नगरको तर्फबाट आवश्यक सहयोग गर्ने बताइन् ।

कार्यक्रममा विभिन्न वडाका वडाध्यक्षहरु, विभिन्न संघ संस्थाका प्रमुख एवम् प्रतिनिधि, पत्रकार, संस्थाका पदाधिकारी, कार्य समिति सदस्य एवम् साधारण सदस्यहरु लगायतको उपस्थिति रहेको थियो । कार्यक्रम संस्थाका अध्यक्ष रामप्रसाद पन्थीको अध्यक्षता, उपाध्यक्ष कृष्ण प्रसाद भण्डारीको स्वागत मन्तव्य एवम् महासचिव कृष्ण प्रसाद पोखरेलको संचालनमा सम्पन्न भएको थियो ।

प्रतिक्रिया

LEAVE A REPLY

Please enter your comment!
Please enter your name here

सम्बन्धित खवर

spot_img

ताजा