बासुदेव पाेखरेल
गुल्मी । धुर्कोट गाउँपालिका–१, नयाँगाउँ साकिनेमा भएको आगलागीका कारण एक गोठ पूर्णरूपमा नष्ट भएको छ। बिष्णु विकको गोठमा साँझ करिब ७ बजेदेखि आगलागी सुरु भएको थियो। आगोले गोठमा रहेको सम्पूर्ण सामग्री जलेर नष्ट हुँदा ठूलो आर्थिक क्षति पुगेको छ।
गोठमा रहेको भैंसी आगलागीका कारण गम्भीर घाइते भएको जानकारी प्राप्त भएको छ। स्थानीय बासिन्दाले ठूलो प्रयासपछि आगो नियन्त्रणमा लिएका छन्। घटनास्थलमा दमकल नपुगेको र स्थानीयकै सहयोगमा आगो निभाइएको बताइएको छ।
प्रारम्भिक अनुमानअनुसार आगलागी विद्युत् सर्ट वा कुनै अन्य दुर्घटनाका कारण हुन सक्ने आशंका गरिएको छ। यद्यपि, आगलागीको ठोस कारण खुल्न भने बाँकी रहेको छ। पीडित परिवारलाई गाउँपालिका र अन्य सहयोगी निकायले उचित राहत उपलब्ध गराउने अपेक्षा गरिएको छ।
