प्रीयकां पन्थी, गुल्मी ।
सरकारले पछिल्लो समय ल्याउन लागेको भनिएको बहुविवाहसम्बन्धि विधेयकको गुल्मीका महिला अगुवाले विरोध जनाएका छन् । सोमबार नेपाली काँग्रेसनिकट नेपाल महिला संघ, नेकपा एमाले निकट अनेमसंघ, नेकपा माओवादी केन्द्रनिकट अनेमसंघ (क्रान्तिरकारी) तथा सामुदायिक महिला सेवा केन्द्रले उक्त विधेयकको विरोध जनाएका हुन् ।
उनीहरुले सोमबार सहायक प्रमुख जिल्ला अधिकारी हरीप्रसाद गैरेमार्फत आफुहरुको विरोध पत्र प्रधानमन्त्रीलाई समेत पठाएका छन् । मुलुकी अपराध संहिता २०७४ को दफा १७५ ले बहुविवाहलाई पूर्ण निधेष गरी सजाय समेतको व्यवस्था भएकोमा उक्त बहुविवाहको अपराधलाई समेत कानुनी मान्यता दिन लागिएकोप्रति गम्भीर ध्यानाकषर्ण भएको पत्रमा उल्लेख गरिएको छ ।
महिलाहरुले यसभन्दा पहिले नै भएका कानुन यथावत कायम गर्ने र अन्यथा कुनै फेरबदल गरेमा आन्दोलनका थप कार्यक्रम घोषण गर्नेसमेत महिलाहरुले चेतावनी दिएका छन् । विरोध पत्रमा नेपाल महिला संघकी अध्यक्ष लक्ष्मी पाण्डे, अनेमसंघको तर्फबाट सपना पन्थी, अनेमसंघ क्रान्तिकारीको तर्फबाट लुम्बिनी प्रदेश सचिव गीता थापा तथा महिला सामुदायिक सेवा केन्द्रको तर्फबाट गंगा थापाले हस्ताक्षर गरेका छन् ।
विरोध पत्र बुझाउने कार्यक्रममा रेसुङ्गा नगरकार्यपालिका सदस्य सीता विश्वकर्मा लगायत जिल्लाका महिला अगुवाहरुको उपस्थिति रहेको थियो ।
