हुमाकान्त पाेखरेल, गुल्मी ।
स्थानीय तह संस्थागत क्षमता स्वमूल्यकन (लिजा)मा लुम्बिनी प्रदेशमा माओवादी केन्द्रले जितेका पालिका उत्कृष्ट भएका छन् । संघीय मामिला तथा सामान्य प्रशासन मन्त्रालयले शुक्रबार सार्वजनिक गरेको नतिजाअनुसार लुम्बिनीका ७४ गाउँपालिकामध्ये माओवादी केन्द्रले जितेका गाउँपालिका उत्कृष्ट तीनमा परेका छन् ।
जसमध्ये गुल्मीका दुई र पाल्पाको एक पालिका रहेको छ । गुल्मीको रुरुक्षेत्र गाउँपालिका ९० अंक ल्याउदँै लिजामा लुम्बिनी प्रदेशमा पहिलो, पाल्पाको रिब्दिकोट गाउँपालिका ८७.७५ अकं ल्याउदैँ दोस्रो तथा गुल्मीको धुर्कोट गाउँपालिका ८७.५० अंक ल्याउदैँ तेस्रो भएका छन् ।
रुरुक्षेत्रमा यदु ज्ञवाली, रिब्दिकोटमा नारायण बहादुर कार्की र धुर्कोटमा भुपाल पोखरेलले नेतृत्व गरेका छन् ।
प्रथम भएको रुरुक्षेत्र गाउँपालिकाले शासकीय प्रबन्धमा ९, संगठन तथा प्रशासनमा ८, बार्षिक बजेट तथा योजना तर्जुमा व्यवस्थापनमा ८, वित्तीय एवं आर्थिक व्यवस्थापनमा ११, सेवा प्रवाहमा १३, न्यायिक कार्यसम्पादनमा ७, भौतिक पूर्वाधारमा १०.५०, सामाजिक समावेशिकरणमा ९, वातावरण संरक्षण तथा विपद् व्यवस्थापनमा ९ तथा सहकार्य र समन्वयमा ५.५ं अकं पाएको छ ।
धुर्कोटले शासकीय सम्बन्धमा ९, संगठन तथा प्रशासनमा ८, बार्षिक बजेट तथा योजना तर्जुमामा ७, वित्तीय एवं आर्थिक व्यवस्थापनमा ११, सेवा प्रवाहमा १४, न्यायिक कार्यसम्पपादनमा ७, भौतिक पूर्वाधारमा १०, सामाजिक समावेशीकरणमा ९.५०, वातावरण संरक्षण तथा विपद् व्यवस्थापनमा ६ तथा सहकार्य र समन्वयमा ५.५० अंक प्राप्त गरेको छ ।
त्यस्तै रिब्दिकोट गाउँपालिकाले शासकीय प्रबन्धमा ९, संगठन तथा प्रशासनमा ७.५०, बार्षिक बजेट तथा योजना तर्जुमा व्यवस्थापनमा ८, वित्तीय एवं आर्थिक व्यवस्थापनमा ९.२५, सेवा प्रवहमा १४, न्यायिक कार्यसम्पादनमा ७, भौतिक पूर्वाधारमा ११.५०, सामाजिक समावेशिकरणमा ८.५०, वातावरण संरक्षण तथा पिवद् व्यवस्थापनमा ७.५० तथा सहकार्य र समन्वयमा ५.५० अकं प्राप्त गरेको छ ।
प्रदेशमा प्रथम भएको रुरुक्षेत्र गाउँपालिकाका अध्यक्ष यदु ज्ञवालीले सम्पूर्ण पालिकाबासी, कर्मचारी एवं जनप्रतिनिधिहरुको सहयोगका कारण यो नजिता हाँसिल गरेको प्रतिक्रिया दिए । अहिलेको नजिताले आगामी दिनमा पनि थप काम गर्ने उर्जा मिलेको उनले बताए ।
रिब्दिकाेट गाउँपालिकाका अध्यक्ष नारायण बहादुर कार्कीले सबैकाे चाैतर्फी सहयाेगका कारण सफलता मिलेकाे बताए ।
धुर्कोट गाउँपालिकाका अध्यक्ष भुपाल पोखरेलले पार्टीको विचार, नीति तथा मार्गदर्शनअनुसार काम गर्दा सफलता मिलेको भन्दै लुम्बिनी प्रदेशमा उत्कृष्ट भएकोले सम्पूर्ण पालिकाबासीलाई बधाई दिए । उनले ‘जवाफदेही नागरिक र उत्तदायी सरकार’ भन्ने अवधारणालाई अपनाएर काम गर्दा सफलता मिलेको बताए ।
देशभरीका चार सय ६० गाउँपालिकामध्ये रुरुक्षेत्र गाउँपालिका दोस्रो, रिब्दिकोट गाउँपालिका पाँचौ र धुर्कोट गाउँपालिका छैठौँ स्थानमा परेका छन् । देशभरमा ९१.७५ अकं ल्याउदैँ धादिङको बेनिघाट गाउँपालिका प्रथम भएको छ ।
